काठमाडौँ, वैशाख २७ गते । नेपाल कम्युनिस्ट पार्टी (माओवादी केन्द्र) को मध्यपहाडी लोकमार्ग (पुष्पलाल मार्ग) अन्तर्गत दोस्रो अभियानको कार्यतालिका सार्वजनिक भएको छ । यसअघि बसेको पदाधिकारी बैठकले अभियान सञ्चालन गर्ने निर्णय गरेपछि तीन सदस्यीय कार्यदलले अभियानलाई मूर्तरूप दिएको हो ।
कार्यदलमा महासचिव देव गुरुङको संयोजकत्वमा उपमहासचिव गिरिराजमणि पोखरेल र वर्षमान पुन रहेको तीन सदस्यीय कार्यदल गठन गरिएको थियो । माओवादी केन्द्रका उपमहासचिव सुदूरपश्चिम प्रदेशका इन्चार्ज गिरिराजमणि पोखरेलले बैतडीको पाटनबाट जेठ १ गते अभियान उद्घाटन हुने जानकारी दिनुभयो । उहाँले भन्नुभयो, “अध्यक्ष प्रचण्डसहित शीर्ष नेता वैशाख ३१ गते साँझ बैतडी पुगिसक्नुहुने छ । जेठ १ गते बिहानै बैतडीको पाटनमा अभियान उद्घाटन हुने छ । पहिलो चरणमा जेठ १ देखि १० गतेसम्म बैतडीदेखि कास्कीसम्म कार्यतालिका बनाएको छ ।”
पार्टीको अभियानमा स्थानीय सरकारसँगै विभिन्न जातजातिले आआफ्नो संस्कृति अनुसार स्वागत गर्ने गरेको उहाँले दाबी गर्नुभयो । उहाँले भन्नुभयो, “हुलाकी राजमार्गकेन्द्रित अभियान मूलतः सफल भयो । लगत्तै मध्यपहाडी राजमार्ग अभियान सुरु हुँदै छ । यसमा जनताको उल्लेख्य सहभागिता छ ।” उहाँले पार्टी अभियानमा गएपछि नेतृत्वलाई नागरिकका तर्फबाट स्थानीय समस्यालाई सम्बोधन गर्न मागपत्र र ज्ञापनपत्र थुप्रै बुझाएको बताउनुभयो ।गोरखापत्र अनलाइन
