२०८१ श्रावण ४ शुक्रबार

बोर्डको दाबी : नतिजामा सुधार भयो, सबैभन्दा बढी ‘नन ग्रेडेड’ गणितमा

काठमाडौं । यस वर्षको एसईई नतिजा गएको वर्षभन्दा सुधार भएको राष्ट्रिय परीक्षा बोर्डले जनाएको छ । बोर्ड अध्यक्ष महाश्रम शर्माले माथिल्लो जीपीए ल्याउनेको संख्या बढेसँगै नतिजा सुधार भएको दाबी गर्छन् ।

‘नन ग्रेडेड’ हुने विद्यार्थीको संख्या बढे पनि धेरै विषयमा अनुत्तीर्ण हुनेको संख्या घटेको उनको भनाइ छ । यस वर्ष अघिल्ला वर्षहरूझैँ गणित विषयमा सबैभन्दा धेरै एक लाख ७७ हजार ९८५ विद्यार्थी नन ग्रेडेड भएका छन् ।

अंग्रेजीमा एक लाख एक हजार ३८३, विज्ञानमा एक लाख २६ हजार ९३३, सामाजिकमा ७३ हजार ८७७ र अर्थशास्त्रमा ६९ हजार ४१६ विद्यार्थी नन ग्रेडेड भएको शर्माले बताए ।

यस्तो छ वर्ष २०७९ र ०८० को तुलनात्मक नतिजा
वर्ष २०८० को एसईईमा चार लाख ६४ हजार ७८५ विद्यार्थी सहभागी थिए । जीपीए ३.६ देखि चारसम्म ल्याउने विद्यार्थीको संख्या ३१ हजार २०९ छ । वर्ष २०७९ को एसईईमा चार लाख ८४ हजार ९३९ परीक्षार्थी सहभागी भएका थिए । सो वर्ष पुरानै ग्रेडिङ प्रणालीअनुसार नतिजा सार्वजनिक गरिएको थियो । नतिजामा ३.६ देखि चार ग्रेड (ए प्लस) ल्याउनेको संख्या २२ हजार ४७५ थियो ।

यस वर्ष ३.२ देखि ३.६ सम्म जीपीएसहित ६८ हजार २५६ जना उत्तीर्ण भएका छन् । यही जीपीए ल्याउने विद्यार्थी वर्ष २०७९ मा ५५ हजार ६९ जना थिए । यस वर्ष जीपीए २.८० देखि ३.२० सहित सबैभन्दा धेरै ७८ हजार ८७४ विद्यार्थी उत्तीर्ण भएका छन् । गएको वर्ष यही नतिजा ७२ हजार ३६२ विद्यार्थीले ल्याएका थिए ।

यस वर्षको नतिजामा जीपीए २.४ देखि २.८ सम्म ल्याउने विद्यार्थी ४१ हजार १७७ जना छन् । यही जीपीए २०७९ सालको एसईईमा ८९ हजार ३३१ जनाले ल्याएका थिए ।

अहिलेको नतिजामा दुई हजार ९५० विद्यार्थीले जीपीए २.० देखि २.४ सम्म ल्याएका छन् । वर्ष २०७९ को एसईईमा यो नतिजा सबैभन्दा धेरै एक लाख दुई हजार २९३  विद्यार्थीले ल्याएका थिए ।

यस वर्षको नतिजामा ६ विद्यार्थीले जीपीए १.६ देखि दुईसम्म ल्याएका छन् । यही नतिजा २०७९ को एसईईमा ८८ हजार ४४७ विद्यार्थीले ल्याएका थिए । २०७९ को एईईमा न्यूनतम ०.८० देखि १.२ सम्मको जीपीएलाई ग्रेडिङ गरिएको थियो ।

ग्रेडिङ हुन कम जीपीए पनि पर्याप्त हुने हुँदा गएको वर्ष २०७९ को नतिजामा १३ हजार ९९२ अर्थात् २.८९ प्रतिशत विद्यार्थी मात्रै नन ग्रेडेड भएका थिए ।

२०८१ असार १३, बिहीबार प्रकाशित 0 Minutes 128 Views

ताजा समाचार