मेचीनगर । आगामी बैशाख ३ गते सार्वजनिक विदा दिनु पर्ने माग राख्दै मेचे समाज शिवियारी आफातले स्थानीय सरकारलाई ज्ञापनपत्र बुझाएको छ ।
आज मेचे समाज शिवियारी आफातले मेचीनगर नगरपालिकामा आगामी बैशाख ३ गते ‘बैशागु बथर’ पर्व पर्ने भएकोले सार्वजनिक विदा दिनु पर्ने माग गरेका हुन् ।
शिवियारी आफातका मेचीनगर अध्यक्ष देशभक्त मेचेको नेतृत्वमा गएको टोलीले नगरप्रमुख गोपालचन्द्र बुढाथोकीलाई ‘बैशागु बथर’ पर्वमा सार्वजनिक विदा दिनु पर्ने मागसहित ज्ञापनपत्र बुझाएको छ ।
ज्ञापनपत्र बुझ्दै नगरप्रमुख बुढाथोकीले अहिलेसम्म कुनै पनि जातिलाई नगरपालिकाले विदा नदिएको बताए ।
उनले मेचे समुदायबाट पहिलो चोटी विदाको निवेदन आएकाले अबको कार्यपालिका बैठकले निर्णय गर्ने जानकारी दिए ।
टोलीमा अध्यक्ष देशभक्त मेचे, सचिव बिक्रम मेचे, केन्द्रीय सदस्य अमर मेचे, पूर्व केन्द्रीय अध्यक्ष रोनलाल मेचे, पूर्व उपाध्यक्ष सन्तोष मेचे, पूर्व संस्कृतिक विभाग प्रमुख पवन मेचे लगायत रहेका थिए ।
मेचे समुदायको राष्ट्रिय पर्व ‘बैशागु बथर’ बैशाख महिनाभरी मनाउने गरिएको छ । नयाँ वर्षलाई स्वागतसँगै मेचे समुदायको पहिरनमा बाजा गाजासहित विभिन्न परिकारको खानपिन गरेर नाचगान गर्ने चलन रहेको छ ।