झापाको बिर्तामोड–१ स्थित बाल्मीकि स्कुलबाट चोरी भएको मोटरसाइकलसहित एक जना इलाममा पक्राउ परेका छन् । मंगलवार बिहान अन्दाजी १०:३० बजे बाल्मीकि स्कुल अगाडिबाट मे ६ प २८६७ नम्बर २२० सीसीको पल्सर मोटरसाइकल चोरी भएको थियो । बाल्मीकिमा स्नातक पढ्दै गरेका बिर्तामोड-५ का सविन शेर्माले स्कुल अगाडि राखेको सो मोटरसाइकल हराएको थियो । हराउने बित्तिकै त्यसबारे इलाका प्रहरी कार्यालय बिर्तामोडमा जानकारी गराएका थिए ।

मोटरसाइकल खोजी गर्नेक्रममा हिजो साँझ ५:३० बजे महमाई प्रहरी चौकीले सो मोटरसाइकलसहित इलाम माई नगरपालिका- ६ बस्ने २४ वर्षीय मनिश गिरीलाई पक्राउ गरेको हो । गिरीलाई मोटरसाइकलसहित राति नै इलाका प्रहरी कार्यालय बिर्तामोडमा ल्याइएको प्रहरी नायव उपरीक्षक प्रकाश विष्टले जानकारी दिएका छन् ।