मेडिकल व्यवसायी दुर्गा प्रसाईँको निमन्त्रणामा आएका दिल्ली युनिभर्सिटीका राजनीति शास्त्रका प्रोफेसर डा. संगीतकुमार रागीलाई प्रहरीले प्रसाईँको कार्यक्रममा भाग लिन रोक लगाएको छ ।
हिजो आएर बिर्तामोडको होटेल किंग्सबेरीमा बसेका रागीलाई प्रहरीले कूटनीतिक मर्यादाविपरित बिना अनुमति प्रसाईँको आन्दोलनको कार्यक्रममा भाग नलिन भनेर सम्झाएको हो । माथिको आदेश रागीलाई सुनाइएको इलाका प्रहरी कार्यालय बिर्तामोडका डीएसपी प्रकाश विष्टले बताए । भारतीय प्रोफेसर आएर बसेको जानकारी आएपछि आफूले बुझ्न लगाएको जिल्ला प्रहरी कार्यालयका प्रमुख प्रहरी उपरीक्षक मिलन केसीले बताए । उनले बिना अनुमति छिमेकी राष्ट्र नेताले आन्दोलनमा सघाउन आउन नमिल्ने भन्दै त्यसबारे केन्द्रसँग बुझ्ने काम भइरहेको जानकारी दिए ।
आफूले बोलाएको पाहुनालाई प्रहरी प्रशासनले अपमान गरेको बीएण्डसी अस्पतालका सञ्चालक प्रसाईँले आरोप लगाए । राति रागी बसेको होटेलमा बिर्तामोडका डीएसपीको कमान्डमा प्रहरी पुगेर कार्यक्रममा गए भने पक्राउ गर्छु भनेर सरकारले आफ्नो अतिथिको अपमान गरेको उनले बताए । त्यसबारे अहिले बिहान ९ बजे उनले पत्रकार सम्मेलन आयोजन गर्दैछन् ।
भारतबाट परिचालित भएको आरोप लागेका प्रसाईँले आफ्नो कार्यक्रममा दिल्ली युनिभर्सिटीका राजनीति शास्त्रका प्रोफेसर रागीलाई बोलाएका हुन् । रागीले आज सुनसरीको इटहरीमा आयोजना हुने सभालाई सम्बोधन गर्ने कार्यक्रम रहेको छ ।हिन्दुवादी चिन्तकको रुपमा परिचित रागी दिल्लीबाट बागडोक्रा हुँदै त्यहाँबाट स्थल मार्गबाट नेपाल आएका हुन् ।
यहाँ प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ । हामीसँग तपाईं फेसबुक र ट्विटरमा पनि जोडिन सक्नुहुन्छ ।
