१७ जेठ, काठमाडौं । अक्सर सबेरै उठ्ने विष्णुकुमारी विष्ट २६ वैशाखको बिहान साढे ७ बज्दासम्म घरमा चहलपहल थिएन । राति नै चोर आएको गाईगुँई चलेकाले उनको घरमा केही समय बिताएका छिमेकीलाई थप शंका लाग्यो । छिमेकी श्रीप्रसाद सिटौला विष्णुकुमारीको घर पुग्दा उनी रक्ताम्य अवस्थामा मृत भेटिइन् ।

झापा बिर्तामोड नगरपालिका–४ शिवनगर टोलकी ६७ वर्षीया विष्णकुमारी एक्लै बस्दै आएकी थिइन् । २५ वैशाखको राति साढे ९ बजेतिर ६७ वर्षीया विष्णुकमारीले काठमाडौंमा अध्ययनरत छोरा प्रकाशलाई फोन गरिन्– घर वरपर चोरहरु पो हिँडडुल गर्दैछिन कि क्या हो ? घरको झ्यालमा ड्याङ–ड्याङ पार्दैछन् ।

लगत्तै प्रकाशले मामा नाता लगाउने छिमेकी श्रीप्रसादलाई फोन गरे– हाम्रो घरमा चोर पसेजस्तो छ । एकछिन गइदिनुस् न ।

श्रीप्रसाद छिमेकी विष्णुकुमारीको घर भए । अवस्थाबारे बुझे । ‘ल अब सामान्य छ, त्यस्तो केही नहोला’ भन्दै आफ्नो घर फर्किएर सुते ।

बिहानै उठ्ने विष्णुकमारीको चहलपहल भोलिपल्ट देखिएन । रातिको घटनाले सशंकित बनेका श्रीप्रसाद साढे ७ बजे विष्णुकुमारीको घर पुगे । सुत्ने कोठा चिहाए । अवस्था दर्दनाक थियो । रक्ताम्य अवस्थामा विष्णकुमारी भुईँमा ढलेकी थिइन् । कुनै संकेत नगरेकाले सिधै भित्र पस्ने आँट श्रीप्रसादले गरेनन् । घटनाबारे काठमाडौंमा रहेका प्रकाशलाई श्रीप्रसादले फोन गरेर जानकारी गराए । प्रहरीलाई पनि घटनाबारे जानकारी गराइयो ।

रक्ताम्य अवस्थामा मृत भेटिएकी विष्णुकुमारीको घटनास्थल मुचुल्का उठाएर झापा प्रहरीले अनुसन्धान अघि बढायो । कम्पाउण्डले घेरिएको एक तले पक्की घरको सुत्ने कोठाको खाटमाथि दिशा थियो । कपडाहरु छरपस्ट थिए । भुइँमा रगत लतपतिएको रड थियो । टाउकामा रडले प्रहार गरेजस्तो चोट थियो । हातको औला काटिएको थियो । ‘क्राइम सिनबाटै मर्डर भन्ने प्रष्ट भइसकेको थियो । रातिको घटनाबारे छिमेकीले बताए पछि लुटपाटका लागि हत्या भन्ने क्लु आइसकेको थियो’ जिल्ला प्रहरी कार्यालय झापाका डीएसपी कृष्णकुमार चन्दले भने ।

स्थानीय इलाका प्रहरी कार्यालय बिर्तामोड र जिल्ला प्रहरी कार्यालय झापाले विष्णुकुमारीको घरको कम्पाउण्ड भित्रबाट एउटा महत्वपूर्ण क्लु भेट्टाए– ब्ल्याक ब्याग (कालो झोला) । ‘अपरेशन ब्ल्याक ब्याग’ नाम दिएर प्रहरीले विष्णुकुमारीको हत्या अनुसन्धान अघि बढायो । झोलामा फलामजन्य सामानहरु समेत थिए । लुटपाट तथा चोरी गर्नकै लागि ती सामान राखेको हुनसक्ने आशंका प्रहरीको थियो ।

फेसन लेखिएको घोडाको टापको जस्तो चित्र भएको कालो झोला बोक्नसक्ने युवा वर्गहरुमाथि प्रहरीले अनुसन्धान अघि बढायो । तर केही सुराक फेला परेन । त्यसपछि झापा आसपासका कपडा पसलहरुले बरामद झोला बेच्ने गरे/नगरेकोबारे प्रहरीले कपडा पसलेहरुसँग सोधुपछ अघि बढायो । तर बरामद झोला झापाका कपडा पसलबाट बिक्री भएको पाइएन ।

युवा वर्गसँगको सोधपुछ र कपडा पसलेहरुबाट समेत ब्ल्याक ब्यागको अवस्था पत्ता लगाउन नसकेपछि अनलाइनमार्फत बिक्री गर्ने कम्पनीमाथि प्रहरीले अनुसन्धान अघि बढायो । ‘हामीले विभिन्न अनलाइन कम्पनीहरुमाथि यो प्रकृतिको झोला बेचे नबचेको र झापाको मान्छेहरुले कस्तो झोला खरिद गरेका छन् भन्नेसम्मको विवरण हेर्‍यौं । त्यसबाट पनि झोला पत्ता लगाउन सकिएन’ डीएसपी चन्दले सुनाए ।

त्यसपछि झापाकै मान्छेलाई प्रहरीले म्यानुअल्ली बरामद प्रकृतिको झोला कसले बोक्ने गरेको भन्दै सोधपुछ अघि बढायो । सोही क्रममा शिवनगरकै डम्बरकुमारी प्रसाईले खुलाइन्– यो झोला त मेरो हो । विष्णुकुमारी हत्याको चौथो दिनमा झोलाको सुनाखत भएपछि प्रहरीले अनुसन्धान लगभग टुंगोतर्फ पुग्ने अनुमान गरे ।

‘झोला कसले बोक्थ्यो ?’ प्रहरीको प्रश्नमा डम्बरकुमारीले जवाफ फर्काइन्– छोराले ।

‘खोई छोरो ?’ प्रहरीको अर्को प्रश्नमा डम्बरकुमारीले जवाफ फर्काइन्– अहिले त बाहिर छ ।

अनुसन्धान लगभग टुंगोमा पुग्न लागेको आश गरेको प्रहरीले थप पुष्टि गर्न थाल्यो । तर झोला बोक्ने डम्बरकुमारीको छोरा कतारमा रहेको खुल्यो । प्रहरीले भिडिओ कलमार्फत कतारमा रहेका प्रसाईँका छोरालाई पनि झोलाबारे सोधपुछ गर्‍यो । उनले कतारमै उनले ४० दिनारमा उक्त झोला खरिद गरेको पुष्टि भयो ।

‘लगभग अनुसन्धान टुंगियो भनेका थियौं । तर झोलाबारे फरक तथ्य आएपछि प्रसाईंको घरको झोला लुटेराले चोरेर लगेको पुष्टि भयो । त्यही लुटेराले विष्णुकुमारीको हत्या गरी गरगहना लुटेको देखियो’ झापाका एक अनुसन्धान अधिकारीले सुनाए ।

प्रारम्भिक चरणमै कुकुरमार्फत अनुसन्धान अघि बढाएको स्थानीयले प्रहरीले संदिग्धको तत्कालै पहिचान गर्न सकेन । अनुसन्धान थप जटिल भएपछि केन्द्रीय अनुसन्धान ब्यूरो (सीआईबी) र कोशी प्रदेशको अनुसन्धान टिम पनि घटनामा जोडिए ।

विगतमा झापमा आसपासमा चोरी तथा लुटपाटमा संलग्न व्यक्ति, लागु औषध दुव्र्यसनी, कारागारबाट कैद भुक्तान गरी छुटेकाहरुमाथि प्रहरीले निगरानी बढायो ।

चारैवटा युनिटले एकसाथ हत्याबारे थप अनुसन्धान अघि बढाए । अनुसन्धानकै क्रममा खुल्यो । विष्णुकुमारीले २ वटा मोबाइल प्रयोग गर्थिन् । तर घटनास्थलमा एउटा मोबाइल भेटिएको थियो अर्को मोबाइल थिएन । उक्त मोबाइलमार्फत प्रहरीले थप अनुसन्धान अघि बढायो । ‘निश्चित लोकेशनमा पुगेपछि मोबाइल अफ गरेको देखियो । थप प्राविधिक पुष्टि गरेपछि हामी हत्यारा नजिक पुगेका थियौं’ सीआईबीका प्रवक्ता तथा एसपी होविन्द्र बोगटीले भने ।

त्यसपछि शंकास्पद अवस्थामा मार्तोल र रेञ्च बोकी हिँडेको अवस्थामा बिर्तामोड नगरपालिका–४ का २२ वर्षीय गंगाप्रसाद राजवंशी र सोही ठाउँका २३ वर्षीय महेश राजवंशी १६ जेठमा फेला परे । यसको साइनो कालो ब्यागमा जोडिएको छ । घटनास्थलबाट बरामद भएको कालो ब्यागमा समेत सोही प्रकृतिका सामानहरु थिए । जसकारण हत्यामा उनीहरुको संलग्नता हुनसक्ने आधार मान्दै विस्तृत अनुसन्धान गर्दा उनीहरुले विष्णुकुमारीको हत्या स्वीकार गरेको पाइएको झापाका एसपी मिलन केसीले बताए ।

दोस्रो प्रयासमा हत्या गरेर लुटपाट

विष्णुकुमारीको हत्या आरोपमा गंगाप्रसाद र महेशका साथै ५ जनालाई पक्राउ गरी आज बिहीबार झापा प्रहरीले सार्वजनिक गरेको छ । उनीहरुसँगै बिर्तामोड–४ कै गंगाप्रसादकी श्रीमती २० वर्षीया वर्षा, सोही ठाउँका ३३ वर्षीय ज्याक भनिने भगिरथ माझी र झापाको अर्जुनधारा नगरपालिका–६ का ४३ वर्षीय धनबहादुर कामी छन् ।

गंगाप्रसाद हत्याका मुख्य योजनाकार रहेको, महेशले घर बाहिर कुरेर कोही आए नआएको जनाकारी गराउने गरेको, वर्षाले लुटेको सामान लुकाउन सहयोग गरेको, ज्याकले लुटेको सामान बेच्न सहयोग गरेको र धनबहादुरले लुटिएको सुन किनेको आरोप प्रहरीले लगाएको छ ।

उनीहरुबाट नट खोल्ने रेन्च, मार्तोल, सुनको सिक्का भएको बेरुवा औठी, हातमा लगाउने सुनको बाला, जन्तर, सिक्री, टप, चाँदीको कलश बरामद गरेको छ ।

विष्णुकुमारीको हत्या गरिएको साँझ ६ बजेतिर २५ वैशाखमा महेश गंगाप्रसादको घर गएर चोरी गर्ने योजना बनाएको खुलेको छ । सिटी सफारीको टायर खोल्न प्रयोग हुने मार्तोल, रेञ्ज बोकेर उनीहरु राति ९ बजेतिर घरबाट निस्केका थिए ।