समयको गति कसैले रोकेर रोक्न सक्दैन । यसको गति सधैँ अविराम, अविरल छ । मान्छेहरू समयलाई घडी, पला, दिन, हप्ता, महिना वर्ष मानेर कसी लगाउँछन् । यसरी ३६५ दिन पूरा भयो भन्ने मापदण्डमा नयाँ वर्ष मान्छन् । अर्थात यो चक्र पूरा भएपछि अर्को दिन आउँछ । त्यही साइतलाई हामी नयाँ वर्षको संज्ञा दिन्छौं । हाम्रो देशमा विक्रम संवतलाई राष्ट्रिय संवत मान्ने प्रचलन छ । यसको मापन बैशाख १ गतेले गर्छ । विश्वका सर्वाधिक सङ्ख्याका देशहरूले जनवरी १ लाई नयाँ संवत मान्छन् ।
नेपालीका लागि नयाँ वर्ष राष्ट्रिय चाड हो । यस दिन राम्रो लाउने, मिठो खाने, शुभकामना आदान प्रदान गर्ने प्रचलन रहेको छ । यस दिन सरकारले राष्ट्रिय पर्वकै रुपमा सार्वजनिक बिदा दिने गरेको छ । हामी जस्तै अरु देशका नागरिकले पनि नयाँ वर्ष धुमधामसाथ मनाउने गरेका छन् । कस्तो छ त उनीहरूको नयाँ वर्ष मनाउने शैली, त्यसबारे जानकारी लिऊँ ।
चीन: नयाँ वर्ष आउनु साता अगाडि देखि नै आतिशबाजी शुरु हुन्छ । यो आतिशबाजी सांस्कृतिक मान्यतामा आधारित छ । उनीहरु भान्छा घरमा देवता रहेको ठान्छन् । तिनै देवताले वर्षभरिका त्यस घरका गतिविधिको रेकर्ड राख्छन् । र नयाँ वर्षका दिन रेकर्ड बुझाउन आफूभन्दा माथिल्लो निकायमा जान्छन् । त्यही दिन उनी यथास्थानमा फर्कन्छन् । तिनै देवताको बिदाई र स्वागतका लागि आतिशबाजी गरिएको भन्ने कथन छ । नव वर्षमा चिनियाँहरू रातभर जागा बसेर आमाबाबु, गुरुप्रति आदरभाव प्रकट गरी आर्शिवाद लिने र स्वादिष्ट भोजन ग्रहण गर्छन् ।
थाइल्याण्ड : नयाँ वर्षको उत्सवमा घरको सफा सुग्घर गर्नुका साथै रातको समयमा दीपावली गर्छन । बौद्ध धर्मालम्बीहरु बुद्ध गुम्बा, चैत्यमा गएर धार्मिक अनुष्ठान गर्दै विश्व शान्ति र भाइचाराको कामना गर्दछन् । यस अवसरमा ठाउँ अनुसारको मिष्ठान्न बनाएर एकापसमा बाँडचुँड गरेर खाने परम्परा छ । अझ गाउँ टोलमा छरछिमेकी, इष्टमित्र, नातागोता भेला भई सुगन्धित जल एक अर्कामा छरेर आमोदप्रमोदसाथ नयाँ वर्षको स्वागत गर्ने प्रचलन कायमै छ ।
