२०८१ असार ३१ सोमबार

पाथीभरा आउने तीर्थयात्रीको गणना सीसी क्यामेराबाट गरिने

फुङ्लिङ । ताप्लेजुङमा अवस्थित प्रसिद्ध धार्मिकस्थल पाथीभरा मन्दिरमा दर्शन गर्न आउने दर्शनार्थीको गणना अबदेखि सीसी क्यामेराबाट गरिने भएको छ । यसका लागि यहाँको ठूलो फेदीमा ‘हेड काउन्टिङ’ सीसी क्यामेरा जडान समेत गरिएको छ ।

पाथीभरा क्षेत्र विकास समितिका कार्यकारी निर्देशक मनमणि काफ्लेले पाथीभरा दर्शनका लागि तीर्थयात्री बासस्थानको मुख्य आधार क्षेत्र माथिल्लो फेदीमा सीसी क्यामेरा जडान गरिएको बताए ।

उनले भने, “नियमित मोनिटरिङ फेदीस्थित प्रहरीचौकीबाट हुनेछ । फेदीबाट फाइबर केबल तानेर पाथीभरा मन्दिर परिसरसम्म पुर्‍याइएको छ । फेदीमा फेस डिटेक्टिङ तथा हेड काउन्टिङ क्यामेरा समेत जडान गरिएको छ ।”

प्रविधिलाई प्राकृतिक प्रकोपबाट जोगाउने हरसम्भव उपायका उपकरणको प्रयोग गरेर यो प्रयास गरिएको छ । पाथीभरामा गरिएको यो पहिलो प्रयास भएको समितिले जनाएको छ ।

तीर्थालुको सुविधाका लागि आउँदो शनिबारदेखि सुरु हुने गरी पाथीभरा मन्दिर परिसरमा चार सीसी क्यामेरा जडान गरिएको समिति अध्यक्ष रक्की थेपेले जानकारी दिए ।

उनका अनुसार मन्दिर प्रवेशद्वार ट्रस्टमा एक, मन्दिरभित्र बायाँ ढोकातर्फ देखिने एक, मन्दिरभित्र देखिने गरी एक, मन्दिरभित्र माताको शिर देखिने गरी एक क्यामेरा जडान गरिएको छ ।

यस्तै, ठूलो फेदीमा कान्छीथान मन्दिर देखिने गरी एक सीसी क्यामेरा जडान गरिएको छ । ठूलो फेदीनजिकै प्रवेशद्वारमा तीर्थालुको संख्या गणना गर्ने गरी हेड काउन्टिङ क्यामेरा राखिएको छ । ठूलो फेदी बजार परिसरमा दुई गरी आठ सीसी क्यामेरा जडान गरिएको छ । रासस

२०८० आश्विन ९, मंगलवार प्रकाशित 0 Minutes 127 Views

ताजा समाचार