एक पटक जसरी प्रधानमन्त्री बन्ने सपना अधुरै रहे पनि तनहुँको व्यास नगरपालिका–८ रिस्ती बाहुनपोखराका पौडेल अन्ततः देशकै सर्वोच्च पद राष्ट्रपतिमा निर्वाचित भए । चुनाव जितेर पनि राजनीतिक परिस्थिति र सत्ता समीकरणले साथ नदिँदा प्रधानमन्त्री हुन नपाएका देउवाले वचन दिएकै कारण राष्ट्रपतिमा जान रामचन्द्र पछिल्लो समय लालायित थिए ।
विद्यार्थी जीवनमै विपी कोइरालासँग निकट भएका पौडेलको कांग्रेसका शीर्ष नेताहरुसँगको उठबसले राजनीतिक महत्वकांक्षा ह्वात्तै बढाएको थियो ।
२०६४ सालको पहिलो संविधानसभा निर्वाचनपछि गिरिजाप्रसाद कोइरालाले नेतृत्वको दाबी नगर्दा रामचन्द्रले संसदीय दलको नेता बन्ने अवसर पाएका थिए ।
संविधानसभाको निर्वाचनपछि प्रधानमन्त्री बनेका माओवादी अध्यक्ष पुष्पकमल दाहाल प्रचण्डले ९ महिनामै राजीनामा दिए र त्यसपछि प्रधानमन्त्री बनेका माधवकुमार नेपालले पनि २०६७ सालको असारमा १३ महिनामै राजीनामा दिए ।
त्यसपछि प्रधानमन्त्री बन्न प्रचण्डविरुद्ध रामचन्द्र पौडेलले उम्मेदवारी दिएका थिए । एमाले तटस्थ बस्दा १७ पटकसम्म मतदान हुँदा पनि प्रधानमन्त्री चयन हुन सकेको थिएन । पछि प्रचण्डले एमालेलाई समर्थन गर्दा २३ माघ २०६७ मा झलनाथ खनाल प्रधानमन्त्री भएका थिए ।
१७ पटकसम्म प्रधानमन्त्रीको उम्मेदवार बनेको भन्दै पौडेलमाथि टिप्पणी हुने गरेको छ । सुशील कोइरालाको निधनपछि पौडेल कार्यवाहक सभापति हुँदै १३ औं महाधिवेशनमा सभापति हुन चाहन्थे तर देउवासँग पराजित भएपछि उनको राजनीतिक यात्रामा बे्रक लागेको थियो ।
नेविसंघको संस्थापक सदस्य र २०४० सालमा कांग्रेसको केन्द्रीय प्रचार समितिको संयोजक भएका पौडेलले २०४८ सालमा तनहुँ–१ बाट निर्वाचित भएर संसदको यात्रा थालेका थिए ।
२०७४ सालको चुनावमा तत्कालीन वाम गठबन्धनका उम्मेदवार कृष्णकुमार श्रेष्ठ (किसान)सँग पौडेल पराजित हुन पुगे । पुराना ‘जानी दुश्मन’ भनेर तनहुँमा चर्चा हुने गोविन्दराज जोशी पौडेललाई हराउन कम्मर कसेर लागेका थिए ।
यसपटकको निर्वाचनको दृश्य भने फरक बन्यो, अघिल्लो पटकको प्रतिस्पर्धी एमाले फुटेको बनेको एकीकृत समाजवादी र श्रेष्ठको पनि पौडेललाई समर्थन थियो । पौडेललाई हराउन पूर्व मन्त्री जोशी फेरि पनि उम्मेदवार थिए । तर, पौडेलले सहजै जिते ।
तनहुँमा सातौं निर्वाचनमा पौडेलको यो छैटौं जीत थियो । अर्को पटकबाट चुनाव नउठ्ने तर यसैपटक जितेर एक पटक प्रधानमन्त्री हुने धोको राखेका पौडेल राष्ट्रपतिको कुर्चीमा पुगेका छन् । पौडेल राष्ट्रपति बनेपछि गृहजिल तनहुँमा खुसी छाएको छ भने अब यहाँको संसदीय राजनीति पनि दोस्रो पुस्तामा आइपुग्ने नेताहरुको भनाइ छ । अनलाइन खबरबाट
