सन् २०२४ मा श्रीलंकामा हुने यू–१९ क्रिकेट विश्वकपको छनोट खेल्न नेपाली टिम आज युएई प्रस्थान गरेको छ । नेपाल क्रिकेट संघ क्यानले आज नै राष्ट्रिय खेलकुद परिषद्मा छनोट खेलमा भाग लिने पुरुष क्रिकेट टोलीको विदाई गरेको थियो । विदाइ कार्यक्रममा नेपाली टोलीका कप्तान देव खनाल र खेलाडी अर्जुन कुमालले अभ्यास राम्रो भएको भन्दै प्रतियोगितामा पनि राम्रो नतिजा लिएर स्वदेश फर्किने बताए ।
नेपाली टोलीका प्रशिक्षक जगत टमाटाले पनि सबै खेल महत्वपूर्ण रहेको र सबै खेलमा सुखद् नतिजा निकाल्ने लक्ष्यका साथ खेल्ने योजनामा टोली रहेको बताए ।
एशिया छनोट फागुन १२ देखि युएईमा आयोजना हुँदैछ । प्रतियोगितामा नेपालसहित सिंगापुर, हङकङ, कुवेत, मलेसिया र आयोजक युएईको सहभागिता रहेको छ । सिंगल राउण्ड रोबिनको आधारमा सञ्चालन हुने प्रतियोगितामा शीर्ष टोलीले आगामी २०२४ मा श्रीलंकामा आयोजना हुने विश्वकप यु–१९ मा सिधै छनोट हुने मौका पाउनेछ । यस प्रतियोगितामा टेस्ट मान्यता प्राप्त राष्ट्रसँग छनोट टोलीले विश्वकप यु–१९ प्रतियोगिता खेल्नेछ ।
