नेत्र चिकित्सक डाक्टर सन्दुक रुइतलाई बहराइन सरकारका तर्फबाट राजा हमाद बिन इसा अल खालिफाले प्रतिष्ठित इशा अवार्ड प्रदान गरेका छन । आज बहराइनको राजधानी मनामास्थित इशा सांस्कृतिक केन्द्रमा आयोजित विशेष समारोहमा राजा खालिफाले झन्डै १४ करोड रुपैयाँको पुरस्कार तथा सम्मान डा.रुइतलाई प्रदान गरेका हुन ।
तिलगंगा आँखा प्रतिष्ठानका कार्यकारी निर्देशक रुइतले अन्धोपनाको उपचारमा गरेको निरन्तरको प्रयत्नका निम्ति बहराइन सरकारले यो विशिष्ट सम्मान प्रदान गरेको हो । पुरस्कार वितरण कार्यक्रममा राजा खालिफाले डा रूइतले सबैभन्दा योग्य, अमूल्य र प्रभावकारी काम गर्दै आएको बताए ।
इशा अवार्ड कमिटीका अधयक्ष सेख मोहम्मद बिन मुबारक अल खलिफाले पनि डा रुइत मानवहितकारी अर्थमा संसारकै लागि उदाहरण रहेको बताए । डा.रुइतले आफ्नो यो अवार्डले आफूलाई अन्तर्राष्ट्रिय क्षेत्रमा प्रतिबद्धता र मेहेनतका साथ काम गर्ने अवसरका रुपमा थप प्रेरणा दिएको बताएका छन ।
झण्डै तीन दशक यता निरन्तर ‘मानवताका लागि सेवा’ गरेबापत रुइतलाई पुरस्कृत गरिएको फाउण्डेशनले जनाएको छ । रुइतले अहिलेसम्म एक लाख २५ हजार भन्दा धेरै व्यक्तिको शल्यक्रिया गरिसकेका छन् । सन् २००९ मा स्थापित यो सम्मान हरेक दुइ वर्षमा र मानवताका लागि सेवा गर्ने विश्वभरकै कोही व्यक्ति संस्थालाई प्रदान गरिँदै आएको छ ।
