मेचीनगर । काँकरभिट्टामा बहुतले बसपार्क बन्ने भएको छ ।
मेचीनगर–६ स्थित काँकरभिट्टा बजारमा बहुउदेश्यीयसहितको बहुतले बसपार्क बन्ने भएको हो ।
अहिलेको काँकरभिट्टाको बस टर्मिनललाई नै बहुतले बसपार्कका रुपमा रुपान्तरण गर्न खोजिएको छ ।
भर्खरै विराटनगरमा सम्पन्न ‘कोशी प्रदेश लगानी सम्मेलनमा’ दीर्घायु विजनेश ग्रुप काठमाडौँले बहुतले बसपार्कका लागि काँकरभिट्टा बस टर्मिनलमा लगानी गर्ने भएको छ ।
त्यसका लागि उक्त ग्रुपले एमओयूमा हस्ताक्षर गरिसकेको अवस्था छ । मल्टी स्टोरियो बस टर्मिनल काँकरभिट्टा परियोजना नामकरण गरिएको छ ।
उक्त काम सम्पन्न गर्न ४० करोड रुपैयाँमा ग्रुपले सम्झौता गरेको छ । यसको सहजीकरण प्रदेश लगानी प्राधिकरणले गरेको छ ।
मेचीनगर नगरपालिकाका प्रमुख गोपालचन्द्र बुढाथोकीले चुनावताका नै काँकरभिट्टा बजारमा बहुउदेश्यीयसहितको बहुतले बसपार्क बनाउने घोषणा गरेका थिए ।
निर्वाचित भएपछि यसका लागि नगरप्रमुख बुढाथोकीले कोशी प्रदेशको लगानी बोर्ड, संघिय सरकार र विभिन्न दातृ निकायमा प्रस्ताव गरिरहेका थिए ।
दुई महिनाअघि मात्र पनि नगरपालिकाको निमन्त्रणामा दक्षिण कोरियाको लगानीकर्ताहरुको टोली काँकरभिट्टामा आएर स्थलगत अवलोकन भ्रमण गरेको थियो ।
यसमा नगर विकास कोष, कोरियाली टिम समेत लगानी गर्न यच्छुक रहेको उनको भनाई छ ।
नगरप्रमुख बुढाथोकीले बहुतले बसपार्क बनाउने योजना सफल पार्न लागि परेको बताए । अव्यवस्थित बस पार्कलाई विभिन्न प्रकारका व्यवसायिक प्रयोजनमा विजनेश गर्ने उदेश्यसहित बहुतले बसपार्क बन्ने उनको भनाई छ ।
‘बहुतले बसपार्कमा अण्डर ग्राउण्ड सवारी साधानको पार्किङ, होटल, मल लगायतका थुप्रैव्यवसायिक विजनेश प्रयोजनहरु रहन्छ’, बुढाथोकीले भने–‘पूर्वी नाका काँकरभिट्टालाई विश्वमा चिनाउन नमूनाकै रुपमा विकास गर्न लागि परिरहेका छौँ ।’
