मेचीनगर । राजतन्त्रका पक्षधरहरुले चैत १५ गते गरेको आन्दोलनको क्रममा भाटभटेनी सुपरमार्केटमा लुटपाट रोक्न बहादुरी देखाउने सुरक्षा गार्ड दुलप्रसाद पराजुलीले पाँच लाख नगद र पाँच ग्रेड बढुवा पुरस्कार पाएकाछन् ।
भाटभटेनी सुपरमार्केटका सञ्चालक मीनबहादुर गुरुङले आज उनलाई दुबोको माला लगाइदिएर नगदसहित सम्मान गरेकाछन् ।
लुटपाट र तोडफोडमा भाटभटेनीलाई जोगाउन भूमिका खेल्ने अन्य कर्मचारीहरुलाई समेत पुरस्कार र सम्मान प्रदान गरिएको छ ।
अन्य तीन सुरक्षा गार्ड सूर्य गिरी, दीपेश खड्का, सोमबहादुर भुजेललाई २५ हजार १ रुपैयाँ र एक ग्रेड बढुवा गरिएको छ ।
यस्तै ग्रोसरी सिनियर सुपरभाइजर सागर गुरुङलाई ५१ हजार एक सय ११ को चेक र दुई ग्रेड बढुवा प्राप्त गरेका छन् ।
सुरक्षा गार्ड पराजुलीले त्यस दिन लुटपाट गर्नेहरूको एक्लै प्रतिकार गरेका थिए । पराजुलीले लुटेराहरूलाई पिटेर लखेटेको भिडियो सामाजिक सञ्जालमा भाइरल भएको थियो ।
