काठमाडौं– विक्रम संवत् १९९९ असोज १६ गते धनकुटामा जन्मिएका भजन शिरोमणी भक्तराज आचार्य २०८० फागुन १४ गते सोमवारका दिनदेखि सधैंका लागि हामीबाट विदा भएका छन् ।
भक्तराज आचार्य गायकमात्रै होइन कुशल संगीतकार पनि थिए । मुटु जलिरहेछ, जति चोट दिन्छौँ, हजार सपना, माया मेरी साँझ बनी, जीवन भन्नु त घात छ, यहाँ जिन्दगीले लगायत झण्डै पाँच सय गीतमा आवाज दिएका संगीतकर्मी आचार्यको निधनमा यतिबेला सांगीतिक क्षेत्र शोकाकूल बनेको छ ।
सामाजिक सञ्जालमा भजन शिरोमणि आचार्यप्रति भाव पूर्ण श्रद्धाञ्जली अर्पण गरिँदैछ । अधिकांश संगीतकर्मीहरुले उनका लोकप्रिय गीतका शब्दहरु शेयर गर्दै श्रद्धाञ्जली अर्पण गरिरहेका छन् ।
भजन शिरोमणी भक्तराज आचार्य केवल गायकमात्र नभएर कुशल संगीतकार पनि थिए । यी दिग्गज संगीतकर्मीले झण्डै पाँच सय सय गीतमा आवाज दिएका थिए ।
तन मन वचनले, प्रभु नामसहित दर्जनौं लोकप्रिय भजनहरु गाएर भजन शिरोमणीको उपाधि प्राप्त गरेका आचार्यका आधुनिक गीत पनि उत्तिकै लोकप्रिय रहेका छन् । आधुनिक शैलीका गीत र भजनबाट उनलाई विभिन्न पुरस्कार र सम्मानबाट सम्मानित गरिएको थियो ।
उनको सबै भन्दा ठूलो सम्मान भनेकै भजन शिरोमणीको उपाधि प्राप्त गर्नु हो । उनलाई पद्मश्री पुरस्कारबाट पनि पुरस्कृत गरिएको थियो । त्यस्तै उनले गोरखा दक्षिण बाहु पदकबाट पनि सम्मानित गरिएको थियो । गोरखा दक्षिणबाहु, त्रिशक्ति पट्ट (पहिलो), विरेन्द्र-ऐश्वर्या सेवा पदक, राष्ट्रिय प्रतिभा पुरस्कार, छिन्नलता पुरस्कार, राष्ट्रिय संगीत सम्मान २०७५ संगै विभिन्न समारोहहरुमा लाईफटाइम अचिभमेन्ट अवार्डबाट सम्मानित हुन सफल थिए ।
आचार्यको जीवनीमाथि ‘आचार्य’ नामक नेपाली फिल्म नै बनेको छ, जसमा भक्तराज आचार्यको जीवनका हरेक उतार-चढावको बारेमा देखाइएको छ । उक्त फिल्ममा सत्यराज आचार्यले नै भक्तराज आचार्यको भूमिका निर्वाह गरेका छन् ।
भक्तराज आचार्यको जीवनमा एउटा यस्तो घटना घट्यो जसको उनले कल्पनासमेत गरेका थिएन् । उनलाई २०४६ सालमा एउटा बज्रपात आइलाग्यो । उनीमाथि काठमाडौंको बौद्धमा सांघातिक आक्रमण भयो । उनको त्यो चोट निको नहुँदै अर्को बज्रपात आइलाग्यो । २०५० मा उनको जिब्रो काट्नु पर्यो र त्यो घटनापछि उनको गायन यात्रामा पूर्ण बिराम नै लाग्यो ।
त्यो बेला नै हो नेपाली सांगीतिक क्षेत्रले एउटा बहुमूल्य प्रतिभाको आवाजलाई गुमायो र नेपाली सांगीतिक क्षेत्रमा अपूरणिय क्षति भयो, जुन क्षति सानो तपस्या र लगावले पुरा गर्न समेत सकेन । हरेक नेपाली स्रोताले उनलाई कहिले बिर्सने छैनन् । उनले नेपाली सांगीतिक क्षेत्रलाई सत्यराज–स्वरूपराज आचार्य जस्ता गायक छोरा उत्तराधिकारीको रूपमा दिएका छन् ।
गीत गाउन असमर्थ भएको ३४ वर्षपछि भजन शिरोमणी आचार्य सधैंका लागि हामीबाट विदा भएका छन् । उनी यो संसारमा नरहने पनि उनका कालजयी गीत–संगीतहरु सदा–सदाका लागि गुञ्जिरने छन् । भजन शिरोमणीप्रति हार्दिक श्रद्धा सुमन ।
