२०८० फाल्गुन २० आईतवार

वडाध्यक्षकी छोरीलाई जागिर लगाउन सुची नै संशोधन

दमक । झापाको गौरीगञ्ज गाउँपालिकाले गौरीगञ्ज अस्पतालमा स्वास्थ्य सहायक पाँचौं तहका दुईजना कर्मचारी नियुक्त गर्न लिएको परीक्षा विवादित बनेको छ ।

परीक्षाका आवेदकहरु २३ जनामध्ये संक्षिप्त सूचीमा नै नअटाएकी वडाध्यक्षकी छोरीलाई नियुक्त दिएपछि विवाद भएको हो । संक्षिप्त सुचीमै नअटाएकी वडा नं. १ का अध्यक्ष कार्तिकलाल राजवंशीकी छोरी कृतिका राजवंशीको नाम थप्न सूचना नै संशोधन गरिएको थियो । गाउँपालिकाले यसअघि मंसिर २७ गते आवेदकहरु २३ जनामध्ये संक्षिप्त सूचीमा १० जनाको नाम प्रकाशित गरेर पुस १ गते हुने परीक्षामा सहभागी हुन सुचित गरेको थियो ।

वडाध्यक्ष राजवंशीकी छोरी कृतिका राजवंशीको नाम १० जनामा समावेश थिएन । दुईदिन पछि मंसिर २९ गते पालिकाले सो सूचना संशोधन गर्दै वडाध्यक्ष राजवंशीकी छोरी कृतिकाको नाम थपेको पाइएको छ ।

प्रथमक सुचीमा नाम नभएकी वडाध्यक्षकी छोरी कृतिकाको नाम ११ पुसमा प्रकाशित परीक्षाको नतिजामा सफल उम्मेदवारको सूचीमा राखिएको छ । उनीसँगै गौरादह-८ की दिपिक्षा निरौला पनि सफल भएको गाउँपालिकाले आफनो आधिकारिक फेसबुक पेजमा अद्यावधिक गरेको सूचनामा जनाइएको छ । बैकल्पिक उम्मेदवारको सूचीमा भने सुमन न्यौपाने र सञ्जयकुमार ताजपुरियाको नाम छ ।

पालिकाको सेवा करारमा कर्मचारी व्यवस्थापन गर्न बनेको कार्यविधि २०७९ अनुसार गाउँपालिकाका प्रमुख प्रशासकीय अधिकृत खेमराज थापाको संयोजकत्वमा पालिका अध्यक्षले तोकेको बिषयविज्ञसहितको समितिले सो परीक्षा लिएको थियो ।

परीक्षाको अन्तिम नतिजा प्रकाशन भएसँगै सामाजिक सञ्जालमा सो परीक्षा निष्पक्ष र धाँधलीरहित हुन नसकेको तर्कसहित पालिकाका नेतृत्वकर्ताहरु र वडाध्यक्ष राजवंशीको चर्को विरोध भइरहेको छ ।

२०८० पुष १२, बिहीबार प्रकाशित 1 Minute 195 Views

ताजा समाचार