२०८० फाल्गुन १९ शनिबार

झापा लिग : बुद्धशान्ति र झापा गाउँपालिका सेमिफाइनलमा प्रवेश

भद्रपुर । बबिन बोहोराको ४ गोल मद्दतमा बुद्धशान्ति गाउँपालिका ओम साई पाथीभरा हस्पिटल प्रथम अन्तर पालिका जिल्लास्तरीय लिग तथा नकआउट फुटबल प्रतियोगिताको सेमिफाइनलमा प्रवेश गरेको छ ।

आज भएको पहिलो क्वार्टर फाइनल खेलमा बुद्धशान्तिले शिवसताक्षीमाथि शानदार जित दर्ता गरेको हो । खेलको अधिकांश समय बुद्धशान्तिले शिवसताक्षीलाई दबाबमा राखेको थियो । शिवसताक्षीलाई ४–० गोल अन्तरले हराउँदा जारी प्रतियोगितामा बुद्धशान्तिका बोहोराको व्यक्तिगत ८ गोल भएको छ ।

खेलको ११ औँ, ४१ औँ, ६६ औँ र ७९ औँ मिनेटमा बबिनले बुद्धशान्तिका लागि गोल गरेका थिए । खेलको प्लेयर अफ दि म्याच भएका उनले नगद दुई हजार र ट्रफी पाए ।

उनलाई गोल्डकपका महासचिव जीवनकुमार श्रेष्ठ, शिवसताक्षीका नगरप्रमुख मेगाहाङ थोप्रा, बुद्धशान्ति गाउँपालिकाका अध्यक्ष मनोज प्रसाईँले नगद दुई हजार र ट्रफी प्रदान गरे । त्यस्तै, आजको दोस्रो क्वार्टर फाइनल खेलमा झापा गाउँपालिका विजयी भएको छ । झापाले भद्रपुर नगरपालिकालाई १–० गोल अन्तरले हराएको हो । खेल अवधिभर दुवै पालिकाबीच कडा प्रतिस्पर्धा भए पनि खेलको ७१ औँ मिनेटमा झापा गाउँपालिकाका किरण उराउले गरेको गोल नै निर्णायक बन्यो ।

खेलको प्लेयर अफ दि म्याच झापा गाउँपालिकाका उमेश मुर्मू भए । उनलाई गोल्डकपका अध्यक्ष दीपेश ढकाल, उद्योगी होम पाण्डेले नगद दुई हजार र ट्रफी प्रदान गरे । जितसँगै झापाले फाइनल प्रवेशका लागि बुद्धशान्तिको सामना गर्नेछ । खेल मंसिर २२ गते हुनेछ ।

खेल तालिका अनुसार तेस्रो क्वार्टर फाइनल खेल भोलि मंसिर २० गते अर्जुनधारा नगरपालिका र बिर्तामोड नगरपालिकाबीच हुनेछ भने अन्तिम क्वार्टर फाइनल खेल मेचीनगर नगरपालिका र गौरादह नगरपालिकाबीच हुने अध्यक्ष दीपेश ढकालले जानकारी दिए । प्रतियोगिताको विजेताले नगद ३ लाख, ट्रफी, मेडल र प्रमाणपत्र पाउनेछ भने उपविजेताले नगद २ लाख, ट्रफी, मेडल र प्रमाणपत्र प्राप्त गर्नेछ ।

२०८० मंसिर १९, मंगलवार प्रकाशित 0 Minutes 113 Views

ताजा समाचार