२०८१ असार ९ शनिबार

आधुनिक सकोसको इकाई साधारणसभा धमाधमः भद्रपुरमा तीन सदस्य सम्मानित

भद्रपुर । झापाको काँकरभिट्टामा केन्द्रिय कार्यालय रहेको आधुनिक बचत तथा ऋण सहकारी संस्थाले १२ औं वार्षिक साधारण सभा अन्तरगत बिहिबार (आज) भद्रपुरस्थित सदस्य सेवा केन्द्र भद्रपुरको इकाइगत साधारण सभामा तीनजना सदस्यलाई सम्मान गरेको छ ।

सम्मानित हुनेहरुमा उत्कृष्ट जेष्ठ सदस्य गुणबहादुर आले मगर, उत्कृष्ट बचतकर्ता विश्वनाथ मण्डल, उत्कृष्ट ऋणीतर्फ इन्द्रकुमारी राई रहेका छन् ।

सम्मानितहरुलाई कार्यक्रमका प्रमुख अतिथि आधुनिक बचत तथा ऋण सहकारी संस्था लिं का निवर्तमान अध्यक्ष तथा सल्लाहकार समिति संयोजक अंगतबहादुर थापा, विशेष अतिथि संस्थाका सल्लाहकार समिति सदस्य मेदनीप्रसाद खरेल, संस्थाका अध्यक्ष कमल थापालगायतले सम्मान प्रदान गरेका छन् ।

कार्यक्रममा प्रमुख अतिथि अंगतबहादुर थापाले समाज रुपान्तरणमा सहकारी क्षेत्रको भूमिका महत्वपूणर् भएको चर्चा गर्दै साधारणसभामा आउने जाने मात्र नभई संस्थाको समग्र अवस्थाका बारेमा सदस्य जानकार हुनुपर्नेमा जोड दिएका थिए ।

कार्यक्रममा विशिष्ट अतिथि खरेलले आफ्नो मन्तब्यमा सबै सदस्यले संस्थाप्रति जिम्मेवार हुनुपर्नेमा जोड दिएका थिए । उनले सबै सहकारी खराब नहुने बताउँदै खराब सोच र उद्देश्यले सञ्चालन भएका सहकारीहरुले मात्र गतल गर्ने गरेको बताए ।

कार्यक्रममा संस्थाका कमल थापाले वार्षिक प्रगति प्रतिवेदन प्रस्तुत गर्दै चालु आर्थिक वर्षमा संस्थाको आम्दानी बृद्धि हुने, रोजगारी सिर्जना हुने र सदस्यलाई आत्मनिर्भर एवम् व्यावसायिक बनाउने खालका योजना ल्याउनेतर्फ संस्था केन्द्रित हुने अवगत गराए ।

संस्थाका लेखा समिति सदस्य केशवप्रसाद कोइरालाले लेखा समितिको प्रतिवेदन प्रस्तुत गर्दै आर्थिक संकटको जटिल अवस्थामा पनि संस्था लक्ष्य प्राप्तितर्फ अग्रसर हुँदै गएको जानकारी दिए । उनले आर्थिक वर्ष २०७९/०८० मा संस्थाको कोष १ करोड ४२ लाख ६९ हजार ८ सय ६७ रुपैया पुगेको बताए ।

संस्थाको वार्षिक कार्यक्रम तथा बजेट व्यवस्थापक पारस ओलीले प्रस्तुत गरेका थिए ।

संस्थाका भद्रपुर सेवा केन्द्र प्रमुख प्रकाश आचार्यले सञ्चालन गरेको कार्यक्रममा स्वागत सञ्चालक समिति सदस्य महतलाल राजवंशीले गरेका थिए ।

२०८० कार्तिक १६, बिहीबार प्रकाशित 0 Minutes 210 Views

ताजा समाचार