मेचीनगर, २५ असोज । मेचीनगर-९ स्थित हरी आधारभुत विद्यालयका एक शिक्षक मदिरामा लठ्ठै भएर विद्यालय पुगेपछि प्रहरीले नियन्त्रणमा लिएको छ । विद्यालयका शिक्षक ध्रुव पौडेल आज विहान पौने १० बजेतिर मदिराले लठ्ठै भएर विद्यालय पुगे । विद्यालय पुगेका उनी पढाउन तिर लागेनन् । उनी त चौरमा फोहोर टिप्न तिर पो लागे ।
शिक्षकको यस्तो हर्कत देखेर सबै अचम्मीत भए । मदिराले लठ्ठै भएका उनी त्यसपछि पढाउनका लागि कक्षा कोठामा पनि गए । तर, विद्यार्थी पढ्न मानेनन् बहिस्कार गरे । ‘सर त रक्सी खाएर मात्नुभएको छ, हामी पढ्दैनौ’, विद्यार्थीहरुले भने । त्यसपछि भने विद्यालयका प्रधानाध्यापक रुद्र प्रसाद फुँयालसहितको टोलीले प्रहरीलाई खबर गरे र मदिरा सेवन पुष्टि गर्न आम्दा अस्पताल धुलाबारी ल्याए ।
अस्पतालमा जाँच गर्दा उनले मदिरा सेवन गरेको पुष्टि भयो । त्यसपछि उनलाई इलाका प्रहरी कार्यालय धुलाबारी ल्याइएको छ । अहिले उनी प्रहरी नियन्त्रणमा छन् । प्रहरी स्रोतका अनुसार अहिले विद्यालय प्रशासन, अभिभावक तथा सरोकारवालाहरुले यस सन्दर्भमा छलफल गर्ने तयारी भइरहेको छ ।
