बुद्धशान्ति । बुद्धशान्तिमा श्रीमान् र श्रीमतीसँगै झुन्डिएकोमा श्रीमतीको मृत्यु भएको छ । श्रीमानको चिन्ताजनक अवस्थामा उपचार भइरहेको छ ।
मङ्गलवार राति करिब १० बजेतिर बुद्धशान्ति गाउँपालिका-४ बस्ने २३ वर्षीय आशिष् लोहार र उनकी २२ वर्षीया श्रीमती प्रिया लोहार घरको कैँचीमा सँगै झुन्डिएका थिए । घरका सदस्यहरूले थाहा पाएर दुवैको पासो काट्दा प्रियाको मृत्यु भइसकेको थियो । आशिष्लाई उपचारका लागि बिर्तामोडको बीएण्डसी हस्पिटलमा भर्ना गरिएको छ ।
उनको त्यही उपचार भइरहेको बुद्धशान्ति– ४ का वडाध्यक्ष शेरबहादुर रायले बताए । उनीहरूका ५ वर्षका छोरी छन् । परिवारसँग छुट्टिएर लोहार दम्पती एकतले मूल घरको बरन्डा कोठामा बस्दै आएका थिए । त्यही कोठामा उनीहरूसँगै झुन्डिएका थिए । उनीहरू झुन्डिनु पर्ने कारणसहित घटनाका बारेमा अनुसन्धान भइरहेको जिल्ला प्रहरी कार्यालयका प्रवक्ता डीएसपी खगेन्द्रप्रसाद रिजालले बताए ।
