झापा । झापाको पूर्वोत्तर बाहुनडाँगीबासीले जंगली हात्तीको आक्रमणबाट ठूलो धनजनको क्षति व्यहोर्दै आएको बर्षौ भयो । तर हात्ती समस्या अहिले पनि जस्ताको तस्तै छ । सीमावर्ती भारतीय भूभागबाट आउँने हात्तीको आक्रमणबाट बाहुनडाँगीलगायत जिल्लाका विभिन्न स्थानमा अहिलेसम्म ७८ जना नागरिकले ज्यान गुमाएका छन् । जसमध्ये ८ जना गैरनेपाली नागरिक रहेका छन् भने सयाँै घाइते भएका छन् ।

भारतको पश्चिम बंगाल हुँदै ठूलो समूहमा नेपाल प्रवेश गर्ने हात्तीले यहाँका नागरिकका घरसँगै अन्नबालीमा क्षति गर्दै आएको छ । सरकारले अहिलेसम्म मृतक परिवार र घाइतेलाई ४ करोड ९१ लाख बढी राहत रकम वितरण गरेको छ । सरकारले मानव हात्ती बिचको द्वन्द्व व्यवस्थापन क्षति न्यूनीकरणका लागि विभिन्न उपायसँगै ठूलो आर्थिक लगानी गरेपनि हात्तीको पीडा भने कम भएको छैन् ।

नेपाल–भारत सीमामा क्षेत्रमै हात्ती रोक्न सोलार फेन्सिङ जडान, हात्ती रूङ्ने टुङ, गस्ती आरआरटी परिचालन गर्दै आएको छ । झापा निर्वाचन क्षेत्र १ मा पर्ने झापाको बाहुनडाँगीलाई राजनीतिक दलहरूले निर्वाचनका समय हात्ती नियन्त्रण नै मुख्य एजेन्डा बनाउँदै आएको पनि धेरै भयो तर अहिलेसम्म दीर्घकालीन समस्या समाधान हुन नसक्दा नागरिकले सरकार भएको महसुस गर्न सकेका छैनन् ।
बाहुनडाँगीको इतिहासमा २०४३ सालमा दाउरा रोज्न जाँदा स्थानिय यसोदा बिकलाई हात्तीले मारेको अभिलेख रहेको मेचीनगर नगरपालिका वडा नं. ४ अध्यक्ष अर्जुनकुमार कार्की बताउनु हुन्छ ।

पीडितका लागि तीनै तहका सरकारको समन्वयमा हात्तीको आक्रमणबाट मृत्यु, घाइते, अन्नबाली र भौतिक क्षतिमा दिइने राहत रकम न्यून भएको स्थानीयको गुनासो छ । झापामा १५ हजार बढी जमिनमा जंगल छ । यहाँ चरणका लागि हात्ती आउने गरेको स्थानीय बताउँछन् । यो जंगलबाट ४ हजार बढी घरपरिवार लाभान्वित रहेको डिभिजन वन कार्यालय झापाका प्रमुख नथुनी गोहिवार यादव बताउँछन् । केही दिनअघि स्थानीय ६२ वर्षिया पद्मामाया पौडेलको आफ्नै घरको करेसाबारीमा हात्तीको आक्रमणबाट मृत्यु भएपछि परिवार तथा स्थानीय आक्रामक बनेका छन् । यस क्षेत्रबाट निर्वाचित संसदहरूले सद्नमा हात्तीको विषय उठान गरेको वर्षौ भयो तर अवस्था जस्ताको तस्तै छ ।