उही तौल भएका मानिसमा पनि मुटुसम्बन्धी रोग र मधुमेह विकासको जोखिम नाटकीय रूपमा फरक पर्न सक्छ । पेट वरपर बोसो किन बढ्छ ? यसै भन्न सकिन्न ? तर निष्क्रिय जीवन वा व्यायाम नगर्नु यसको एउटा कारण हुन सक्छ । मानिसहरू आ–आफ्नो जीवनमा यति व्यस्त छन् कि प्रशोधित खानेकुरा र फास्ट फूडको खपत बढेको छ ।

पेटको बोसो नाप्ने एक मात्रै सटिक तरिका भने सीटी वा एमआरआई स्क्यान हो । पेटमा कतिको बोसो लागेको छ भन्ने कुरा इञ्चीटेपले कम्मर नापेर पनि थाहा पाउन सकिन्छ । महिलाको कम्मर ३५ इन्च र पुरुषको ४० इन्चभन्दा धेरै हुनु उनीहरूमा मुटुको रोग र दोस्रो खालको मधुमेहको जोखिमको खतराको सङ्केत भएको नेशनल इन्ष्टिच्यूट अफ हेल्थले भनेको छ ।

कम्मरको बोसो कसरी घटाउने

राम्रो कुरा के छ भने हामी कम्मरमा थुप्रिएर बसेको बोसोलाई हटाउन सक्छौँ । स्वास्थ्य जीवनशैली, सन्तुलित भोजन र नियमित व्यायाम नै यसको उपाय हो । पेटमा लागेको बोसो घटाउने अचुक उपाय व्यायाम नै हो । व्यायामले समग्रमा तौल त घटाउँछ नै तर यसले पेटको बोसो बढी घटाउँछ ।

खानपान:

चिनी र स्याचुरेटेड फ्याट धेरै भएका खानेकुराहरू सकेसम्म नखानुहोस् । हामीले तरकारीमा प्रयोग गर्ने वनस्पति तेलले पनि पेटको बोसो बढाउँछ भनेर केही अध्ययनले देखाएका छन् । त्यसैले तेलको खपत सकेसम्म कम राख्नुहोस् ।

व्यायाम:

हरेक दिन निश्चित समय व्यायाम गर्नुहोस् । पेटको बोसो घटाउन एरोबिक्स बढी लाभदायक हुने बताइन्छ । तर रेसिस्टेन्स ट्रेनिङ पनि लाभदायक हुन्न भन्ने चाहिँ होइन ।